Medya Hus
Cae Aceh
"PESTA DEMOKRASI"
Pemilu legislatif hayeue han sakri
Di nanggroe RI troh Aceh raya
Caleg di Aceh bereh hansakri
Bak reubot kursi rame lagoe na
155 droe caleg DPR RI
Jeut dapil akhi jareng suara
Nyo DPRA rame hansakri
1.259,nyang antri jak mita tahta
Nyo DPRK pih rame antri
9.033, hai abi kabupaten kota
40 droe DPD keumawe u RI
Mita kurusi peuteubiet dana
Nyo DPR RI 13 blah boh kursi
Meu ahli ahli mita suara
Di DPRA 81 boh kursi
650 lagi di DPRK
Cuma DPD 4 boh kurusi
Sideh hai akhi di jakarta
Bandum ureueng nyoe jinoe hai abi
Duson ngon pasi jak ilah daya
Geutron ugampong langsong promosi
Gamba meuriti geulhat dum rata
Ladom acara Silaturrahmi
Ladom hai akhi jak meu en bola
Ladom sie kameng peugot khanduri
Ladom geujakbi seutrop ngon saka
Ladom jok bajee meulagee janji
Tujuan kursi meuteumee beuna
Meumacam cara bak mita kursi
Mandum nyan abi masalah hana
Asai beumuphom nyan demokrasi
Bek dawa dawi hana meulaba
Peue lom poh meupoh reuloh Islami.
Dosa bak Rabbi Nanggroe meubala
Beuna kesadaran rakan dan ahli
Nyang calon waki beubijaksana.
Sesabe Peureute beu ade meuri
Bak mita kursi bek peugot dawa
Limong thon sigo tanyoe meunoe hi
Atoran RI nanggroe meurdeka
Pemilu dame Cipta hai akhi
Bek cara keji mita suara
Talakee do`a ubak Ilahi
Aceh Serambi aman sentosa
Ureueng nyang jahat Ya Allah neubi
Geutem sadari woe bak nyang beuna
Hukom Agama bek ta ingkari
Dudoe Tuhan bi tanyoe lam bala.
©medya hus seniman Aceh
