Donya ka akhe tan le meutentee
Nyang sibok batee cukop that gura
Ladom nyan inong pih saboh lagee
Gadoh ngen batee peutimang gaya
Teuma nyang meukat na nyang meulagee
ureung geutipee tan takot dosa
Peulom oh mugreb nyan katroh watee
Mantong bak batee ato hareuga
Ladom kupiyah pakek bak ulee
Ladom lam abee ngen ateuh meja
Di ureung jak bloe pih kacho ulee
Bak pileh batee meumacam warna
Bahpih ka mugreb han geuwoe dilee
Giok seulendee teungoh geumita
Gasa ngen haloh geulhoh ngen sentee
Kadang geuteumee gamba benua
Gabuek deungon peng ka mereng watee
Buet nyang peureulee hanle keurija
Hana teuingat nyang got that batee
Dua neuk teuntee nibak pusara
Kon le bak jaroe tanyoe sok batee
Gaki ngon ulee geuglong keu tanda
Kon batee Giok kon batee Nungkee
Tapi cit tentee batee pusara
Bacut taingat nyang meukat batee
Tajaga watee bek sagai riya
Niekmat Allah bri raseki teuntee
Syukur jeut watee beuna lam taqwa
