Jeungki Meuayoen alee meudoda

ngen kata saleum rakan lon sanjong
Dusoen ngen gampong atawa banda
Assalamu'alaikum uloen kheun langsong
Jaweub neusambong soe yg na baca

Hikayat jeungki alee ngen leusong
Ureung tot teupong samboet puasa
Haba lon karang dirumoh panggong
Bak saboh gampong lambatee nama



Geudam geudum meu antok leusong
Jeungki meu ayoen alee meudoda
Meusahoe hinan ureung tot teupong
Takalon langsong cukop that gura

Nyak wa fatimah gidong bak ujong
Si intan payong tamah tenaga
Nyak salmi tulak breuh teupong
Tarek lam leusong ayak segera

Cuma Saboh teuk jeungki digampong
Ladom hai kaom tan le deh nyata
katroh puasa ingat boh rom-rom
Sedia teupong seureta gula

Hikayat jeungki bek le lon sambong
Kata ta suson panyang cerita
dari tot pade sampe tot teupong
alee ngen leusong pih na cerita

Teuma diakhe peumeuah ampoen
Kadang silap loen bak karang haba
Bacut nasehat peusan dari loen
Mari ta junjong benda budaya

__create by: Ceksin