PEUNAJOH ACEH

Ranup seulaseh meutindeh urat.
Peujamee Sahbat soe nyang ban teuka.
Peunajoh Aceh bereh leupah that.
Meumacam mangat watee tarasa.

Dan oh tapajoh meutamah sehat,
Cit jeut keu ubat haleue lagoe na.
Miseue tapeugah Kuwah Pliek meuhat.
Bahan jih le that jeuet keupeunawa.

Kuwah beulangong meukeunong that that.
Timu ngon barat le ureueng hawa.
Lheueh nyan Sie Reuboh, tapajoh mangat.
Metamah sehat tuboh pih teuga.

Peue lom keumamah, leupah that mangat.
Peuleumak siat ngon boh u tuha.
Oh te tapajoh teuingat ingat
Kuliner sehat di Aceh Raya.

Cukop le bagoe meunyo taingat
Peunajoh mangat Aceh Pusaka.
Meunan cit Kuweh meuceh dum lethat.
Dodoi, Meuseukat, Keukarah, pihna.

Tumpoe, ngon Wajeb, cukop sep mangat.
Tamah Bulukat, ngon asoe kaya.
Samaloyang, Bugring, Bingkang, Bhoi, meuhat.
Ade, that mangat Apam lom teuma,

Cukop le macam makanan sehat.
Lethat mamfa`at oh te tarasa.
Cirikhas Aceh bereh leupah that.
Di sampeng lezat cukop le guna,

Beudoh geutanyoe timu ngon barat.
Peunajoh mangat beudoh ta cinta.
Kuliner Aceh Kwualitas got that.
Tuboh teuh sehat Efek jih hana.

Bahan alami kosumsi sehat.
Beuna taingat Peunajoh Pusaka,
Cinta ata droe tanyoe mamfa`at.
Tuboh teuh sehat Tamong beulanja.

Medya Hus