Meukawen

Na saboh uroe peunoh kenangan
Bak Nabi Adam awai phoen mula
Dalam syiruga phoen keujadian
Turon teumuron keunoe udonya
________________
Faedah meukawen na padum macam
Rasul janjongan na neu meusabda
Peutama phoen-phoen seulamat iman
Dari ganguan syaitan durjana

Seulamat hate dari tipuan
Seulamat badan dari meuzina
Tapuwoe nafkah tieup uroe Tuhan
Mandum atra nyan han sia-sia

Han geubri trep-trep hudep meulajang
Bisikan syaitan han reuda-reuda
Ibarat tanyoe bak buet geularang
Han jan lheuh badan dalam nuraka

Nabi Muhammad na neu meukalam
Keu ureung agam nyang hudep kaya
Menyoe na ade bak tapeutimang
Neuyu meukawen leubeh dari sa

Di ureung inong hanjeut geularang
Keu ureung agam meukawen dua
Menyoe na ade bak tapeutimang
Tan sihet jalan blang padang masya